Саемот на автомобили во Женева традиционално е место каде најдобрите (па и оние помалку добрите) производители на автомобили премиерно ги покажуваат нивните најнови и најатрактивни модели. Таков е случајот и со Bugatti, кој го претстави специјалниот модел La Voiture Noire.
Bugatti La Voiture Noire е базиран на популарниот хиперавтомобил Chiron, а неговата цена изнесува 12 милиони фунти, односно 9,5 милиони фунти без данок. Со таа цена, овој модел стана најскапиот комерцијален автомобил во светот.
Покривката од La Voiture Noire ја тргна претседателот на Bugatti, Стефан Винкелман, кој му го покажа на светот новиот „ѕвер“ од компанијата која е позната по суперлуксузните автомобили. Автомобилот е веќе продаден и има сопственик кој ќе може да се израдува на неговиот quad-turbo W16 8.0-литарски мотор што развива 1.500 коњски сили и има вртежен момент од 1.600 Nm.
Како што напоменавме погоре, La Voiture Noire е базиран на Bugatti Chiron и му оддава почест на моделот Type 57 SC Atlantic, произведен во 1936 година. Тоа исто така беше уникатен модел кој му припаѓаше на дизајнерот Жан Бугати, син на основачот на компанијата.
Жан загина во сообраќајна несреќа во 1939 година, а неговиот автомобил исчезна без траг во текот на првите денови од германската инвазија на Франција во 1940 година.