Кинескиот конгломерат BYD ја претстави новата платформа за полнење на електрични возила, за која тврди дека може да трае колку и полнењето гориво, и најави изградба на мрежа на станици за полнење низ Кина.
Таканаречената „супер е-платформа“ ќе може да ги полни батериите со рекордна брзина со 1.000 киловати (kW), што ќе им овозможи на возилата да патуваат 400 километри по петминутно полнење, изјави основачот на компанијата Ванг Чуанфу на настанот што се емитуваше во живо од седиштето на компанијата во Шенжен.
Брзината од 1000 kW би била двојно поголема од онаа на Supercharger на Tesla, која достигнува брзина до 500 kW.
Технологијата за брзо полнење се смета за клучна за усвојувањето на електрични возила бидејќи ќе помогне да се намали анксиозноста на возачот.
„За целосно да ги решиме грижите на нашите корисници за полнењето, се стремиме да го направиме времето на полнење на електричните возила толку кратко како и кај возилата на бензин“, рече Ванг.
„Ова е првпат во индустријата да се постигне мегаватна единица во моќта на полнење“, рече тој.
Новата технологија за полнење првично ќе биде достапна во две нови електрични возила, седанот Han L и теренецот Tang L, кои чинат околу 34.000 евра, а BYD соопшти дека ќе изгради 4.000 станици за ултра брзо полнење низ Кина.
Компанијата не прецизираше временска рамка или колку ќе инвестира во изградба на такви локации.
Сопствениците на BYD досега главно се потпираа на станици за полнење од други производители на автомобили или јавни станици за полнење за полнење на батериите на нивните возила.
