Cadillac сезонава ќе испорача три различно обоени V-LMDh Hypercar прототипи, со кои ќе се натпреварува во шампионатот ИМСА и Светскиот шампионат за издржливост (WEC).
Во Cadillac одлучија два хибридни прототипа од класата Hypercar сезонава да учествуваат на повеќечасовни трки од шампионатот IMSA, а третиот прототип во чија каросерија доминира сината боја ќе бие битки во Светскиот шампионат на издржливост (WEC - World Endurance Championship).
Црвениот и жолтиот прототип со стартни броеви 31 и 01 ќе дебитираат на патеката на првата од 11-те трки на северноамериканскиот шампионат ИМСА (24 часа Дејтона) што започнува на 28 јануари, додека синиот прототип со стартен број 2 ќе ја започне својата борба за слава на 17 март кога започнува првата од седумте трки на WEC шампионатот (1.000 милји Себринг).
Прототипот со кој Cadillac сезонава ќе се соочи со бројните конкуренти од класата Hypercar го покренува атмосферскиот 5,5-литарски V8 LMC55R мотор, кој покрај хибридниот систем има и 680 коњски сили.
Шасијата ја „потпишува“ италијанска Dallara, а 7-степен секвенцијален менувач е одговорен за пренос на силата до шасијата.
„Подготвени сме да се соочиме со најдобрите, а особено сме среќни што се враќаме во Ле Ман, каде се вози најпребирливата трка во светот“, изјави првиот човек на американската компанија, Рори Харви. Претходно беше објавено дека синиот Cadillac V-LMDh во WEC ќе биде управуван од искусното трио составено од Новозеланѓанецот Ерл Бамбер и Британците Алекс Лин и Ричард Вестбрук.
