Светското првенство во Катар е првото што се одржува во земја со мнозинско муслиманско население, а едно од главните прашања за фудбалските фанови кои планираат да присуствуваат е дали ќе може да се консумира алкохол.
Катарските власти претходно најавија дека алкохолот ќе биде дозволен, но под строго контролирани услови, а сега се знае како сето тоа ќе функционира.
Катарските власти ја забранија продажбата и консумирањето на пиво и алкохол на стадионите, а сите навивачи кои ќе го сакаат тоа ќе можат да купуваат за време на Светското првенство во одредени периоди и во одредени фан зони и хотели во Доха, главниот град на Катар. Непродажбата на алкохол на стадион не е ништо ново бидејќи вакво правило важи и во натпреварувањата на УЕФА.
А, покрај ограниченото време и место за купување алкохол, лошата вест е и цената. Имено, на некои места цената на пивото ќе биде околу 18 долари, што е за повеќе од 100% поскапо од претходните Светски првенства.
За потсетување, Светското првенство во Катар ќе се одржи од 21 ноември до 18 декември годинава.
