Цената на барел нафта денеска падна под 50 американски долари, бидејќи појавата на нов сој на коронавирус во Велика Британија повторно ја зголеми загриженоста за побарувачката, придушувајќи го оптимизмот околу вакцинацијата против COVID-19.
На лондонската берза цената на барел нафта пада за 43 центи во споредба со претходното затворање, на 50,48 долари. На американската берза еден барел се тргуваше за 48 центи пониско, односно за 47,49 долари.
Откривањето на новиот сој поттикна неколку земји да ги затворат своите граници за Велика Британија, иако британскиот министер рече дека работат со Франција за повторно отворање на еден од најважните трговски патишта во Европа.
Откритието го потисна оптимизмот поттикнат од почетокот на вакцинацијата против COVID-19, што се смета за клучно за нормализирање на животот и со тоа закрепнување на побарувачката на нафта.
„Во борбата помеѓу загриженоста за краткорочна перспектива и оптимизмот за иднината, сега повторно преовладува првото, рече Тамас Варга од PVM.
Неодамнешното покачување на цените кулминираше во Лондон во петокот кога барелнафта се тргуваше за 52,48 долари, што е највисока вредност од март.
Трговците внимателно го следат производството. Организацијата на земјите извознички на нафта (ОПЕК) и нејзините сојузници се очекува да го зголемат производството за 500.000 барели на ден во јануари. Сè уште нема индикации дека падот на цените ја поколеба ваквата намера.
Рускиот вицепремиер Александар Новак вчера рече дека зголемувањето на производството не треба да резултира со прекумерна понуда.
ОПЕК денеска не ја објави новата цена на барел сирова нафта на својата веб-страница. Последните податоци се од четвртокот, кога изнесуваше 50,78 долари.
