Цените на нафтата денеска се искачија на 86 долари на меѓународните пазари, бидејќи знаците за намалена побарувачка на работна сила во САД ги поттикнаа шпекулациите дека централната банка сепак може да ги намали каматните стапки до крајот на годината за да ја поттикне економската активност и побарувачката за енергија.
На лондонскиот пазар цената на барелот за испорака во август годинава беше за 78 центи повисока отколку на затворањето на тргувањето вчера и изнесуваше 85,89 долари.
На американскиот пазар барелот за испорака во јули се тргуваше по 70 центи повисока цена отколку на затворањето на тргувањето во вторник, по 82,27 долари. Во средата американските пазари беа затворени поради празникот.
Трговците се фокусираа на податоците за бенефициите за невработеноста на американското Министерство за труд во четвртокот.
Иако помалку Американци поднеле барање за бенефиции минатата недела, нивниот вкупен број се зголеми една недела порано на највисоко ниво од јануари, што сигнализира намалена побарувачка за работна сила.
Пониските трошоци за задолжување би можеле да и дадат импулс на економската активност, што би значело и поголема побарувачка за енергетски производи.
Цените на нафтата се поддржани и од геополитичките тензии. Во првата половина од неделата трговците беа загрижени поради пожарот на нафтените терминали во руското пристаниште Азов по нападот со украински дрон. Овие терминали испраќаат 200 илјади барели нафта и нафтени продукти дневно.
Сезонскиот раст на побарувачката на нафта, зголемената преработка и неповолните временски услови се поврзани со намалената понуда од Организацијата на земјите извознички на нафта (ОПЕК) и нејзините сојузници, па затоа резервите треба да почнат да се намалуваат во текот на летото, според аналитичарите.
Одделно, ОПЕК објави дека барел нафта на нејзините членки во средата поскапе за 1,04 долари на 85,54 долари.
