Тренерот на Барселона, Чави Ернандес, ја оцени играта на Роберт Левандовски во неговиот деби натпревар во Ла Лига.
Каталонскиот клуб вчера одигра нерешено без голови со Рајо Ваљекано во натпреварот од 1. коло на шампионатот на Шпанија. Полскиот напаѓач ги одигра сите 90 минути.
„Задоволен сум бидејќи Левандовски работи за тимот. Одлично ја контролира топката и им помага на соиграчите. Но, секако ни треба поголема ефикасност. Денес ова е главниот проблем на тимот. Роберт, како и сите нас, е разочаран од овој резултат. Ќе почне да постигнува голови, тоа е прашање на време“, изјави Чави.
Најдобар играч на натпреварот беше македонскиот репрезентативен голман Столе Димитриевски кој веќе три средби по ред не дозволува да биде совладан од играчите на Барселона.
