Легендата на тимот од „Камп Ноу“ признава дека еден ден сака да се врати во Каталонија, но тоа нема да се случи сега.
Чави Ернандес вели дека сите веќе го гледаат како нов тренер на Барселона, а тој и сам се гледа во таа улога, но во иднина.
„Во моментов сум во Ал Сад и добро ми е тука. Во голем азиски клуб сум, во Катар. Тоа е најдобриот катарски клуб. Ќе видиме што ќе донесе иднината. Сите ме гледаат како тренер на Барселона, а јас имам голема почит кон Барса и кон Куман, сегашниот тренер“, вели Чави во интервју за официјалната веб-страница на ФИФА.
Чави како играч дебитраше за Барса во 1998 година и во кариерата одигра 767 натпревари на кои постигна 85 голови, сметајќи ги сите официјални натпреварувања. Освои 8 титли во Ла Лига, 3 во Копа дел Реј, 4 во Лигата на шампиони и 2 Светско клупско првенство.
„Не сакам да ја кријам вистината - секако дека сакам еден ден да ја водам Барселона. Тоа сум го кажал многу пати. Но, јас секогаш ќе го почитувам моменталниот тренер, како и клубот. Им посакувам сѐ најдобро. Јас сум навивач на Барселона откако знам за себе“, додава тој.
Чави денес има 41 година и досега одлично се покажува во тренерските води. Со Ал Сад освои 4 куп титули, а претходно освојуваше и како играч бидејќи токму во истиот клуб ја заврши кариерата.
