Лошата форма на „Сините“ го зема цехот, а жртвата е стратегот Френк Лампард. Информациите од Островот говорат дека Челси веќе има устен договор со Томас Тухел.
Челси денеска му врачи отказ на Френк Лампард иако синоќа тој го внесе тимот во четвртфиналето од ФА купот со победата од 3:1 над второлигашот Лутон.
Тимот од „Стемфорд Бриџ“ сезонава е вистинско разочарување во Премиер лигата каде по 19 кола е дури на 9-тото место со 6 порази, 5 нерешени и 8 победи, со 11 бодови заостанување зад лидерот Манчестер Јунајтед. Дека формата на „Сините“ не се поправа показател се и трите пораза во последните пет лигашки натпревари.
Затоа пак во Лигата на шампионите Лампард успеа својот тим да го однесе во нокаут фазата и тоа како првопласиран во групата, без пораз. Сепак, мора да се има предвид и слабата конкуренција со Севиља, Краснодар и Рен.
Порталот Goal тврди дека Роман Абрамович веќе ја има замената за Лампард и тоа во Томас Тухел, кој по заминувањето од ПСЖ е без ангажман. Германскиот стратег лани го однесе ПСЖ до своето прво финале во Лигата на шампионите, а за време на својот престој во Париз двапати ја освои Лиг 1, еднаш Куп де Франс, еднаш Лига купот и двапати Суперкупот. Доби отказ пред точно еден месец, на 24 декември, поради неколку слаби резултати. Предходно со успех ја водеше Борусија од Дортмунд иако освои само еден ДФБ куп. Тренерската кариера ја почна во вториот тим на Аугсбург, а потоа пет години го водеше Маинц каде го тренираше и поранешниот македонски репрезентативец Николче Новески.
Лампард во јули 2019 застана на кормилото на својот поранешен клуб за кој играше 13 сезони. Челси го водеше на 84 натпревари на кои забележа 44 победи, 12 нерешени и 23 порази со 52,4% успех. Не успеа да освои трофеј, а еднаш, во октомври 2019 беше прогласен за тренер на месецот во Премиер лигата.