Тимот на Ливерпул по 30 години чекање вечерва има шанса конечно да прослави титула во Премиер лигата, но само доколку Челси му направи услуга и го сопре Манчестер Сити.
Тимот на Јирген Клоп вечерва пред малите екрани со големо нетрпение ќе ја следи пресметката на Челси и Манчестер Сити.
Откако синоќа го декласираше Кристал Палас со 4:0, Ливерпул сега има 23 бодови предност пред второпласираниот Манчестер Сити, единствениот тим кој теоретски може да му помати сметки. „Граѓаните“ вечерва го играат нивниот натпревар од 31. коло и доколку не слават на „Стемфдорд Бриџ“ тогаш и математички Ливерпул ќе ја освои титулата.
А дека ќе имаат тешка задача говори и фактот што на Челси и тоа како му е потребна победа во борбата да ја задржи четвртата позиција и да се пласира во Лигата на шампиони. „Сините“ со 51 бод се само два бода пред забрефтаните Манчестер Јунајтед и Вулверхемптон кои го посакуваат токму местото во европската елита.
Челси вечерва прво игра за себе, за Лигата на шампионите, но истовремено, сакале или не, играат и за ривалот Ливерпул. Нивно славје ќе значи славје и за „Црвените“ и прва титула по сезоната 1989/90 кога под водство на легендарниот шкотски стратег Кени Далглиш последен пат беа шампиони на Англија. Дури Челси и да не победи, односно доколку натпреварот заврши нерешено, Ливерпул повторно ќе слави.
Доколку Манчестер Сити успее да дојде до трите бода среде Лондон, тогаш в недела во директен дуел во Ливерпул ќе се обиде уште еднаш да му ја одложи прославата.
Вечерашниот дуел на „Сремфорд Бриџ“ почнува во 21.15 часот, а правдата ќе ја дели Стјуарт Атвел.
