Конечно. Официјално. Без шпекулации. Доцна синоќа беше потврдено дека белгискиот репрезентативец Еден Азар конечно заминува од Челзи и преминува во редовите на Реал Мадрид, тим што отсекогаш бил неговиот сон.
Шпекулациите за неговиот трансфер траеја со месеци, а деталите околу договорот се менуваа речиси секој ден. Сега е официјално – Азар заминува од Челзи – а англискиот клуб објави емотивно видео во кое се збогува од една од своите најголеми ѕвезди.
Договорот на Белгиецот со „кралскиот клуб“ е за 5 години. Повеќе детали не се откриени, но според медиумите, договорот вреди 100 милиони евра, а кон оваа сума се предвидени и разни бонуси.
Претходно вчера, официјалната продавница Реал почна да ги продава дресовите на Азар со бр.7, што беше јасен сигнал дека објавувањето на трансферот е неизбежно.
Во четврток следната недела, 28-годишниот фудбалер ќе биде претставен на „Сантијаго Бернабеу“. Претходно, тој ќе ги помине медицинските прегледи.
Азар во неколку наврати призна дека сака да игра за Реал Мадрид и сега ќе може да го исполни својот сон.
Белгиецот се проби во големиот фудбал со тимот на Лил, а во 2012 година потпиша со Челзи. Со „синиот“ дрес од Лондон, тој забележа вкупно 352 натпревари и постигна 110 гола. Азар има две титули со Челзи во Премиер лигата, го освои ФА Купот и Лигата Купот, а двапати беше шампион и на Лига Европа.
За репрезентацијата на Белгија, крилниот играч има 100 натпревари и 30 гола.
