Лондонскиот клуб се подготвува за заминувањето на белгискиот репрезентативен голман Куртоа со тоа што веднаш ги активираше преговорите за трансфер на 23-годишниот Кепа Аризабалага, кој во моментов настапува во редовите на Атлетик Билбао.
Цената на трансферот би требало да изнесува 80 милиони евра, со што Челзи повторно ќе го собори рекордот за најскап трансфер на голман, откако пред само еден месец тоа го направи Ливерпул кога го купи Алисон Бекер од Рома за 75 милиони евра.
Пред крајот на минатата сезона Кепа Аризабалага беше поврзуван со Реал Мадрид, но изгледа дека неговиот сон се сруши кога Тибо Куртоа изрази желба да се пресели во Мадрид и актуелниот европски шампион реши агресивно да преговара со Челзи за неговиот трансфер. Поради овој склоп на околности Челзи го стави фокусот на Аризабалага, кој е помлад од Куртоа и има откупна клаузула од 80 милиони евра.
Според шпанските и англиските медиуми, Реал Мадрид би требало да плати околу 35 милиони евра за Куртоа, кој е во последната година од договорот. На тој начин Челзи ќе го финансира трансферот на Аризабалага и ќе го реши проблемот со пополнување на голманската позиција.
Денеска шпанските медиуми потврдија дека Челзи е во преговори со Реал Мадрид за позајмица на хрватскиот репрезентативец Матео Ковачиќ, кој би требало да го засили клубот до крајот на утрешниот ден, кога всушност и завршува летниот трансфер период во Премиер лигата.
