Во чешкиот Парламент вчера изби тепачка меѓу пратениците при расправа во Долниот дом за барањето на Владата уште за еден месец да се продолжи кризната состојба прогласена поради пандемијата со коронавирусот.
Кога му беше исклучен микрофонот на еден пратеник, тој се степа со претседавачот на седницата. Независните пратеници Лубомир Волни и Маријан Бојко предизвикаа гнев кај некои свои колеги уште на почетокот на седницата бидејќи дојдоа без заштитни маски, непочитувајќи ги мерките на Владата за што им се заканува казна од 400 евра.
Кога претседавачот на седницата, социјалдемократот Томаш Ханзел, му кажа на Бојко дека треба да се срами и побара од него да стави маска, на говорницата излезе Волни и почна со навреди кон Ханзел и социјалдемократите, по што беше предупреден дека микрофонот ќе му биде исклучен.
Двајцата потоа се најдоа во конфликт, а на помош на претседавачот дојдоа и други пратеници. Од снимката може да се види како обезбедувањето го исфрли Волни од салата.
Независните пратеници Волни и Бојко се избрани од редовите на чешките радикални националисти чиј лидер Томио Окамура остро го осуди нивното однесување.
