Првенството на Северна Америка, познато како Голд Куп, дојде до самата завршница откако ноќеска се комплетираа полуфиналните двојки.
Репрезентацијата на Канада, која е најмалку позната по фудбал, успеа да приреди изненадување и да ја исфрли Костарика, редовен учесник на Светските првенства и еден од фаворитите за пехарот. Канаѓаните иако на првенството настапуваат без своите две најголеми ѕвезди, Алфонсо Дејвис од Баерн и Џонатан Дејвид од Лил, сепак стигнаа до своето прво полуфинале по 2007 година откако со 2:0 ги елиминираа Костариканците. Џуниор Хојлет во 18. минута ја најави победата која ја запечати Стивен Еустакио во 68. минута.
Домаќинот САД е во потрага по својот седми пехар. Ноќеска се намачи со Јамајка чиј отпор го скрши на седум минути пред крајот благодарение на голот на Мет Хоп.
Претходно во неделата гостинот Катар ја продолжи одличната серија и со 3:2 славеше над Ел Салвадор. Уште во 2. минута Али Алмоез го отвори резултатот, а по 8 минути игра водството го дуплираше Абдулазиз Хатим. Актуелниот азиски првак десет минути по паузата дојде до убедливи 3:0 со вториот гол на голгетерот Алмоез, а потоа за кратко Ел Салвадор се врати во игра со двата гола на Хоакин Ривас во 63. и 66. минута. Сепак, докрај Салвадорците не успеаја да дојдат до трет гол.
На бранителот на тронот и главен фаворит, Мексико, му беа потребни 38 минути за да го среди Хондурас. Рохелио Фунес во 26. минута, Џонатан дос Сантос во 31. и Орбенил Пинеда во 38. минута се погрижија за убедлива победа.
Полуфиналните натпревари се на програмата в петок рано наутро. Во Остин од 1:30 часот по македонско време ќе се сретнат Катар и САД, додека во 4:00 во Хјустон Мексико и Канада ќе го дадат вториот финалист.
Финалето е закажано за 5:30 часот на 2 август на „Алиџант“ стадионот во Парадајс, Невада.
Мексико со 11 трофеи е лидер во Северна Америка, САД има 6 (последниот во 2017), Канада има 2 од кои последниот во 2000, додека Катар прв пат учествува и ќе се обиде да стане трета репрезентација која како гостин дошла до финале откако тоа претходно им успеа на Бразил (во 1996 и 2003) и на Колумбија (во 2000 година).
