Барање за апанажа до Собранието досега доставиле доскорешниот вицепремиер за европски прашања Никола Димитров, потоа министерка за образование Мила Царовска, како и министерка за одбрана Радмила Шекеринска.
Како што информира собраниската прес-служба, Комисијата за прашања на изборите и именувања претходната недела го одобрила барањето за апанажа на поранешниот министер за земјоделство, шумарство и водостопанство, Арјанит Хоџа. Тој, како што информираа од Собранието, има право на апанажа во траење од 9 месеци.
Деветмесечна апанажа му е одобрена и на поранешниот заменик-министер за култура од редовите на Беса, Седат Сулејмани, кој исто како и Хоџа поднесе оставка во ноември минатата година.
Според Законот за плата и други надоместоци на пратениците и другите избрани и именувани лица, функционерите на кои им престанал мандатот имаат рок од 30 дена да се вратат на старите работни места или да побараат апанажа, која им следува во зависност од тоа колку време биле на функцијата, но не подолго од една година.
Ако мандатот на функционерот траел до 6 месеци, тој има право на апанажа од 3 месеци. За мандат од 6 до 12 месеци следува апанажа од половина година. Надоместокот е во траење од 9 месеци за мандат од 12 до 24 месеци, а за подолг мандат од две години следува апанажа од една година.
За време на остварувањето на ова право пратеникот, функционерот нема право на други примања и надоместоци на трошок, односно апанажата ќе биде прекината, ако во меѓувреме се вработи.
Надоместокот е во висина на платата што ексфункционерот ја добивал додека бил на функцијата.
