Четири лица од три клуба се позитивни на коронавирусот на последното тестирање што го спроведе англиската Премиер лига.
Од Премиер лигата соопштија дека во понеделникот и вторникот за COVID-19 биле тестирани 1.008 играчи и членови на персоналот, при што четири лица од три клубови биле позитивни.
„Играчите или членовите на персоналот кои се позитивни ќе мора да одат во самоизолација“, соопштија од лигата.
Во Англија пред евентуалното обновување на фудбалот беа спроведени 2.752 тестови, а досега има регистрирани 12 позитивни тестови.
Дваесетте клубови од англиската Премиер лига вчера едногласно изгласаа да се продолжи со тренинг со дозволен контакт што е важен чекор за продолжување на првенството.
Тренинзите без контакт и во помали групи од по пет играчи се дозволени од минатата недела, но сега клубовите „ќе може да тренираат колективно (до 10 играчи) при што ќе биде дозволен поблизок контакт со цел да се одземе топката, но и понатаму се ограничува непотребна физичка близина“, стои во соопштението од Премиер лигата.
Во Англија не е одигран ниту еден натпревар од март кога пандемијата со коронавирусот го блокираше спортот во целиот свет.