По минатата сезона, која беше за заборавање, Барселона изгледа како тим кој е подготвен за големи работи оваа сезона.
По шест одиграни кола, Каталонците се втори зад максималниот Реал, имаат 16 бода и застрашувачка гол-разлика 18:1.
Чави донесе неколку играчи кои му беа потребни. Најпрвин нападот го засили со феноменалниот Роберт Левандовски. Тренерот на Барселона воведе низа промени, а сигурно е дека во своите планови повеќе не ги гледа легендите и актуелни клупски капитени како Алба, Пике и Роберто. Четврти капитен е Серхио Бускетс, а според шпанските медиуми и тој треба да си замине, па Каталонците ќе останат без капитен.
Според каталонски Sport, Чави веќе ги има подготвени нивните наследници. 19-годишниот Педри треба да стане прв капитен, а друштво ќе му прават Араухо, Тер Штеген и Левандовски.
Sport пишува дека Чави планирал меѓу капитените да го постави Усман Дембеле, но челниците на Барселона веднаш го прекинале тој план поради низата скандали и инциденти поврзани со францускиот напаѓач.
