Здравје

Човечките тела се ладат: Просечната температура не е 37 степени

21. јануари 2020 - 15:29 | Б.С.Б.

Сите знаат дека просечната телесна температура е 37 степени Целзиусови, но тоа сега е променето. Просечната телесна температура е опадната во последните 150 години, покажува нова студија.

Резултатите покажуваат дека денешните современи мажи имаат телесна температура пониска за 0,58 степени за разлика од мажите од 19 век, додека жените имаат пониска температура за 0,32 степени Целзиусови.

 „Лекарите кои со децении ја проучуваат телесната температура знаеле дека 37 степени Целзиусови е превисока телесна температура“, вели докторката Џули Парсонет од Универзитетот Стенфорд во Калифорнија.

Таа додава дека докторите отсекогаш мислеле дека е тоа грешка во минатото, а не затоа што температурата всушност е падната.

За да откријат што навистина се случило Парсонет и нејзиниот тим комбинирале три вида податоци. Анализирале вкупно 677.423 мерења на температури. Во просек, телесната температура опаѓала за 0,03 степени Целзиусови по деценија.

Мажите родени на почетокот на 19 век имале телесни температури за 0,58 степени Целзиусови повисоки од мажите денес. Податоците за жените не одат далеку наназад, но нивната телесна температура е падната за 0,32 степени Целзиусови од 1890 година.

Тоа значи дека просечната температура денес е околу 36,6 степени Целзиусови, а не 37 степени Целзиусови како што се мислеше.

Според научниците, придонес за намалувањето на телесната температура има напредната медицина, подобрата хигиена, начинот на исхрана и подобрените стандарди за живеење.

„Кај луѓето се променети висината, тежината и телесната температура. Не знаеме точно што значи тоа во однос на нашето здравје, но тоа нешто ни укажува. Податоците кажуваат дека се менуваме и дека тоа што го имаме направено во последните 150 години нè има сменето како никогаш претходно, вели Паросент.

Студијата е објавена во списанието eLife.

Коментирај