Научници открија нов тип на високофреквентен бран на површината на Сонцето кој се движи трипати побрзо отколку што експертите мислеа дека е можно.
Тие забележале дека овие акустични бранови, наречени високофреквентни ретроградни (HFR) вителни бранови, се движат низ Сончевата плазма во спротивна насока од нејзината ротација.
Бидејќи научниците не можат толку лесно да ги анализираат длабоките области на нашата ѕвезда, тие често ги мерат акустичните бранови кои патуваат низ нејзината површина и се враќаат назад кон јадрото за да откријат што се случува во непознати области на Сонцето.
Три можни причини, од кои ниту една не одговара на податоците
Но, кога преку анализа на 25-годишни податоци од вселената и копнените телескопи открија дека брановите HFR на површината на Сонцето се движат со невидена брзина, сфатија дека им недостасува голем дел од загатката за тоа како функционира нашата ѕвезда, пишува Live Science.
Научниците првично мислеа дека овие акустични соларни бранови се формираат во близина на површината на Сонцето благодарение на Кориолисовата сила која дејствува на секое тело што се движи во ротирачкиот систем. Насоката на Кориолисовиот ефект е нормална на насоката на движење на телото, како и на оската на ротација на одреден систем, а точките на екваторот на ротирачкото тело изгледаат како да се движат побрзо од точките на половите.
Експертите веруваат дека брановите по формирањето се забрзуваат во HFR бранови поради три можни причини. Можеби магнетното поле на Сонцето или неговата гравитација ги забрзува Кориолисовите бранови или тоа е поттикнато од супержешки конвективни струи кои се движат под и низ сончевата површина. Но, ниту еден од овие процеси не одговара на податоците.
„Се чини дека овие бранови не настанале поради споменатите процеси“
„Ако HFR брановите би можеле да се припишат на кој било од овие три процеси, тогаш тие би добиле одговори на важни прашања за функционирањето на Сонцето“, рече соларниот физичар Крис Хансон од Центарот за вселенска наука на Универзитетот во Њујорк во Абу Даби.
„Но, се чини дека овие бранови не настанале поради споменатите процеси, што е многу возбудливо бидејќи отвора дополнителни прашања“, додаде тој.
Студијата Discovery of high-frequency retrograde vorticity waves in the Sun беше објавена во списанието Nature Astronomy.
