Петнаесетгодишната Алина Загитова беше големото изненадување во дисциплината уметничко лизгање на ЗОИ 2018 во Пјонгчанг. Таа го донесе првиот златен медал за руските олимпијци во Јужна Кореја кои се натпреваруваат под името OAR (Olympic Athletes of Russia).
Додека сите очекуваа нејзината сонародничка Евгенија Медведева (18) да го понесе златото, Загитова одушеви со изведбата во слободен стил и заврши со 1,31 поени пред Медведева.
„Ми треба малку време да сфатам дека победив на Олимпијада“, изјави Загитова.
„Знаев дека немам простор за грешка. Рацете ми трепереа, но телото памтеше сѐ што учев на тренинг.“
Причината зошто руските олимпијци не настапуваат како Тим Русија е допинг скандалот од 2014 година на Зимските Олимписки игри во Сочи. Меѓународниот олимписки комитет по тригодишна истрага лани донесе одлука да ѝ забрани на Русија да се натпреварува. Настапот под ознаката OAR беше компромисно решение, со кое тимот не користи знамиња и симболи на Русија и не ги носи боите на земјата. Тоа значи дека медалите одат за тим OAR, а не за Русија.