CNN дојде до видеоснимка на која се гледа како руските сили безмилосно убиваат украински војници кои се предале.
На видеото се гледа како Украинците одат среде правлива патека, а потоа паѓаат на колена со рацете на глава. Неколку секунди подоцна, снимките од украински дрон покажуваат дека тие лежат со лицето надолу, неподвижни.
Снимките од август, направени за време на борбите во близина на Покровск во источна Украина, покажуваат егзекуција на тројца украински војници кои се предале. Вакви инциденти има сè повеќе. Видеото нема да го прикажуваме поради вознемирувачката содржина.
Украинските одбранбени разузнавачки извори ѝ дадоа на CNN листа од 15 документирани случаи во текот на изминатата година во кои Русите ги убиле украинските војници кои се предале, наместо да ги земат како затвореници.
Канцеларијата на главниот обвинител на Украина истражува 28 вакви инциденти од почетокот на војната, во кои загинаа 62 украински војници.
„Ако војниците се предадат, ако јасно покажат дека се предале, ако немаат оружје во рацете - тогаш погубување по кратка постапка е воено злосторство“, рече Андриј Костин, главен обвинител на Украина.
Неколку руски војници се изведени пред суд за вакви злосторства. На пример, украинските обвинители наведуваат дека руски поранешен затвореник, ослободен за да може да се бори, застрелал украински војник во Запорожје во јануари, додека тој со кренати раце излегувал од ровот во близина на Пријутна. Како доказ прикачија видео од дрон.
Украинската одбранбена разузнавачка служба ѝ достави на CNN аудиотранскрипти на кои се слуша како руски командант, познат како „Турчин“, му наредува на подредениот на терен, „Малој“, да убие затвореници.
Турчин: Среди ги, ебате уништи ги, да не остане ништо.
Малој: Разбирам, разбирам.
Турчин: Јавете се кога ќе ги средите.
Извор од ОН изјави за CNN дека неколку такви случаи на очигледни егзекуции на украински војници се под истрага.
„Има многу такви, постои шема. Ова укажува на можна наредба. Овие убиства се индивидуални воени злосторства и заедно може да претставуваат злосторства против човештвото“, рече изворот.
