Фудбал

Црна магија го повреди голгетерот на шведската лига

22. ноември 2019 - 12:36 | Ф.З.

Напаѓачот на Сиера Леоне тврди дека црна магија е причината за неговата повреда поради која пропушти квалификациски натпревар на неговата репрезентација.

Мохамед Буја Туреј настапува за шведскиот шампион Јургорден и воедно го предводи нападот на репрезентацијата на Сиера Леоне. Изминатава сезона заврши како најдобар стрелец во Шведска со 15 голови.

За време на изминатава репрезентативна пауза тој ѝ се приклучи на Сиера Леоне во квалификациите за пласман на Африканскиот куп на нации 2021.

Откако играше на првиот натпревар дома со Лесото кој заврши 1:1, Туреј потоа го пропушти гостувањето кај Бенин откако наеднаш почнал да го боли ножниот палец. Но, за него не се работи за обична повреда.

„Немав никаква повреда на палецот кога играв против Лесото бидејќи никој не ме ни згазна ни удри. Но, почнав да чувствувам болка во палецот наредниот ден кога се вратив во хотелот каде што беше сместен тимот. Тимскиот лекар ме прегледа и не најде ништо. Потоа болката се засили кога дојде времето за тренинг, се рашири низ целото стапало и потоа низ целата нога. Тогаш решив да побарам мои роднини кои ме однесоа кај една жена на преглед“, вели Туреј за BBC кој очигледно веднаш знаел за што станува збор.

„Жената ми рече дека повредата на палецот е поради тоа што сум згазнал на духовна мина ставена специјално за мене од страна на личност која сака да добијам елефантијазија и со тоа да ми ја уништи кариерата. Исто така ми кажа и дека доколку сум отишол во болница или сум пробал стандардни лекови, тоа ќе било крај за мојата кариера“.

Елефантијазија е болест која се манифестира со зголемување и згуснување на долните екстремитети како последица на оток на ткивата. За фудбалер тоа би било фатално.

Тој смета дека станувањето најдобар стрелец во Шведска ја поттикнало личноста да реагира од љубомора. Фудбалерот навистина верува дека повредата на палецот од ногата му е од фрлена црна магија.

Туреј на својот facebook профил детално ја објасни целата приказна:

Коментирај