Патриција Дагорн, која во медиумите беше нарекувана „Црната вдовица од француската Ривиера“ доби затворска казна од 22 години за убиство на двајца мажи и труење на уште две жртви.
Обвинителството во Ница рече дека Дагорн била „перверзен нарцис“ која се обидела да се збогати заведувајќи мажи што ги запознавала главно преку агенции за посредување во наоѓање партнер.
Таа наводно главно на жртвите им барала пари или да ѝ биде препишано наследството по нивната смрт.
57-годишната Дагорн ги негира сите обвиненија. Таа веќе отслужува петгодишна затворска казна за измама и кражба.
По судењето за овие обвиненија, полицијата повторно ја отвори истрагата за смртта на Мишел Кнефел од 2011 година, маж на 60-тина години со кого таа живеела во Ница.
Полицијата кај неа открила таблети „валиум“ и разни лични документи на име на различни мажи, како лични карти, банкарски извештаи и документи за здравствено осигурување.
Затоа инспекторите ја прошириле истрагата кон други нерешени смртни случаи на луѓе што имале поврзаност со неа, како 85-годишниот Франческо Филипоне, кој бил најден мртов во када во 2011, во близина на Кан.
Таа претходно кеширала чек на негово име во вредност од 21.000 евра. Дагорн тврди дека тие пари биле подарок од него.
Двајцата мажи кои Црната вдовица ги труела со лекови, но успеале да се спасат од неа, Анж Пискота (82) и Роберт Вокс (91) се приклучиле на случајот со посебни тужби.
„Таа беше како сончев зрак во зима. Кога сте со помлада жена знаете дека нема да трае долго, но нема да се лишите од тој момент освен ако не сте мазохист“, рече Вокс.
Тој додава дека здравјето значително му се влошило откако Дагорн почнала да живее со него во почетокот на 2012 година.
Докторот му рекол дека е во „смртна опасност“. Дагорн го труела со „валиум“ додека се обидувала да му го украде имотот.
Полицијата смета дека Дагорн, која е дипломиран правник, се забавувала со најмалку 20 мажи во периодот од 2011 до 2012 година.