Хрватска го одби барањето на Црна Гора за обука на неколку војници, пишуваат црногорските медиуми кои потегот го толкуваат како одговор на неодамнешното црногорско усвојување на резолуцијата за Јасеновац.
„Побједа“ од Подгорица објави дека хрватското Министерство за одбрана потврдило дека го одбило барањето да се примат двајца питомци на Армијата на Црна Гора да студираат на Хрватскиот воен универзитет.
Црногорското радио „Антена М“ претходно објави неофицијална информација дека покрај одбивањето на приемот на двајца питомци, не е прифатено ниту барањето на црногорското Министерство за одбрана за запишување на еден кандидат од црногорската војска во Хрватската воена академија.
„Министерството за одбрана донесе таква одлука, а за идната соработка во таа област ќе известиме кога ќе дојде време“, велат од хрватското Министерство за одбрана за „Побједа“. Според „Антена М“, Црна Гора преку својот воен пратеник побарала од хрватското министерство да прими тројца припадници на црногорската армија во воените училишта, но добила негативен одговор.
Медиумите ова го толкуваат како уште еден потег што Хрватска го направи како одговор на неодамнешното усвојување на Резолуцијата за Јасеновац во црногорскиот парламент. Загреб за персона нон грата ги прогласи претседателот на црногорскиот парламент Андрија Мандиќ, вицепремиерот Алекса Бечиќ и пратеникот Милан Кнежевиќ.
И во Црна Гора се шпекулира дека Хрватска во ЕУ ги блокирала средствата за Црна Гора наменети за модернизација на армијата преку Европската програма за мир. Црногорскиот парламент на крајот на јули усвои резолуција за осуда на геноцидот во логорите Јасеновац, Маутхаузен и Дахау.
Усвојувањето на таа резолуција, која ја предложи лидерот на просрпската и проруска десница Андрија Мандиќ, е негов одговор на поддршката на црногорската влада за резолуцијата за Сребреница, која малку порано ја усвоија Обединетите нации. Хрватска жестоко реагираше испраќајќи протестна нота до Подгорица и предупреди дека таквите одлуки може да го загрозат нејзиниот европски пат.
