Сега веќе ова е стара вест, но за секој случај ќе ве потсетиме дека далеку над нас, во вселената лебди една црвена Tesla Roadster која Елон Маск ја прати таму заедно со ракетата Falcon Heavy. Веројатно веќе не е ни исправна за возење, па затоа НАСА ја регистрираше како небесен објект.
Поради тоа што оваа Tesla не е управувана и не е можно да се одреди нејзината крајна дестинација, група научници од Торонто тргнаа во потрага на одговор на прашањето: Дали возилото може да се урне на Земјата?
Тие и самите велат дека не може да се даде конкретен одговор кога се работи за крајната локација на која ќе заврши оваа Tesla, но затоа тука постојат истражувањата и технологијата, па тие ќе го следат автомобилот и неговото движење .
„Претпоставуваме дека постои можност за судир во некоја од планетите, посебно Земјата и Венера, каде што шансите се 6% односно 2,5%. Сепак, се работи за претпоставка за периодот од следните милион години, така што не се грижете дека ќе доживеете да го видите тоа“, напишаа авторите во истражувањето.
Автомобилот во моментов се наоѓа во елиптична орбита која ќе го однесе многу подалеку од Марс, околу 150 милиони километри оддалечено од Сонцето.
Авторот на истражувањето, Хано Реин, рече дека многу било возбудливо да се гледа самиот лет на автомобилот. Тој, заедно со групата научници, извршил голем број тестови, поголемиот дел од нив биле статистички тестови, бидејќи е многу тешко да се моделира нешто кое е многу тешко да се контролира, како што е моменталниот лет на Tesla-та, температурата во вселената и непредвидените флуктуации на брзина. Следната блиска средба со Земјата на овој Tesla Roadster ќе биде во 2091 година.