Иако допрва ќе треба да почекаме да почне продажбата, барем сега го знаеме името.
Електричниот новитет на Cupra беше најавен минатата година со концептот UrbanRebel, а сега знаеме какво име ќе носи сериската верзија. Како што открија од таборот на производителот, новата Cupra ќе се вика Raval.
Подобрите познавачи на Шпанија ќе знаат дека моделот го добил името по добро познат дел од Барселона.
„Равал е еден од изненадувачките делови на Барселона и денес сме горди што идниот урбан електричен автомобил на брендот ќе го носи тоа име и ќе го претставува тој посебен дух“, објасни извршниот директор на Seat и Cupra, Вејн Грифитс во Automobile Barcelona, каде беше одржана најавата.
Познато е и дека ќе се произведува во фабрика во Марторело, Шпанија, но и дека цената на овој модел би требало да биде близу 25.000 евра.
Поставен на платформата MEB и со 226 КС на предните тркала, ова може да биде прилично забавен автомобил, особено ако се земе предвид времето од 6,9 секунди до 100 км/час на претходно прикажаниот концепт. Очекуваме секако послаби перформанси и автономија од 440 километри.
Како што е познато, Raval ќе биде поемотивна верзија на Volkswagen ID.2, а Škoda некако ќе се вклучи во приказната со своја верзија.
