„Небо во кафез“ како возрасно дете буричка по светот околу себе, го отсокрива, го препокрива, покажува на работи очигледни, а заборавени, или заматени од премногу зашербетена лага, и гласно кажува „Царот во нас е гол!“, ќе напише Ѓоко Здравески за најновото поетско остварување на Д.А. Лори.
Во фоајето на кино Фросина во Младинскиот културен центар утре, 26 октомври, 2019 година во 18 часот и 30 минути ќе се одржи промоција на книгата поезија „Небо во кафез” од Долорес Атанасова-Лори.
Театарот на сенки „Сенки и облаци“, со својата магија на сенки и бои ќе претстави дел од поезијата, за која претстава гласовите ги позајмија Ѓоко Здравески, Биљана Стојановска, Верица Недеска и Долорес Атанасова-Лори, а музиката е на Горан Атанасов.
На промоцијата ќе читаат: Снежана Стојчевска, Биљана Стојановска и Ана Голејшка Џикова.
Поетесата Долорес Атанасова-Лори (Д.А. Лори) е добитник на наградата „Тодор Чаловски“ за 2019-2020 година во областа на поезијата, книжевната критика, есеистиката и креативните прозни форми.
Д.А. Лори е родена во 1974 во Германија. Раното детство го поминува во Германија, а потоа се сели со семејството во Охрид, каде го поминува детството и средношколските денови. Во 1993 во Скопје запишува студии по англиски јазик и книжевност. Оттогаш живее во Скопје, каде работи како професор по англиски јазик. Песните на Д.А.Лори првпат беа објавени во Букбокс, по што следи соработка со издавачката куќа Блесок, за која, во 2014, ја издава својата прва збирка поезија насловена „Будење во трето лице еднина“.
Во 2016, од печат излегува „Со ветрот под рака“, во издание на издавачката куќа Антолог. По пауза од три години, во 2019, излегува нејзината трета книга, „Небо во кафез”. Во меѓувреме, нејзини песни се објавувани во поетската збирка „100.000 поети за промена” и е-книгата „Поетискон”, како и на страната на Словокулт, онлајн магазин за уметност и литература, и Fixpoetry, германска платформа за литература на интернет.
Поезијата на Д.А.Лори е исто така објавена во монографијата на Астални проекции, како и во најстарото македонско списание за литература, култура и уметност, „Современост”. Долорес Атанасова-Лори е добитник на интернационалната награда на „Антево Слово”, која за првпат беше доделена во 2017 во склоп на италијанската поетска манифестација Ангело ла Векија. Досега нејзината поезија е преведена на германски, англиски, српски и шпански јазик.