Доколку немаше интервенции од ВАР собата, по 25 кола во Ла Лига екипите на Барселона и Реал Мадрид сега ќе имаа ист број на бодови.
Благодарение на системот за видео арбитража, Каталонците освоија 4 бода, додека во исто време Кралскиот клуб загуби 5. Без корекции на одлуките, со помош на ВАР системот, шпанските гиганти би биле израмнети на врвот со по 61 бод.
Барселона во неделата навечер го совлада Атлетик со 1:0 како гостин во Билбао. Во 87. минута судијата Хесус Хил Мансано го поништи голот на Ињаки Вилијамс поради играње со рака на Икер Муниаин. Оваа одлука беше донесена по разгледување на ситуацијата со ВАР.
„Имаше допир на топката со рака, од страна на Муниаин, но не беше толку јавно и очигледно дека голот веднаш ќе биде поништен. А Де Јонг со подадена рака се избори за топката. Оваа одлука мораше да ја донесе судијата и ВАР не требаше да се меша“, изјави поранешниот елитен судија Алфонсо Перес Буруљ.
„Сѐ уште мислам дека топката го погоди Муниан во рамо. Погодокот не може да се поништи поради оваа ситуација. Оваа одлука нѐ чинеше бодови“, се жали дефанзивецот на Баскијците, Микел Балензиага.
Барселона е лидер на табелата со 65 бодови, а Реал Мадрид е на второто место со 56. Следното коло на програмата е токму големото дерби меѓу овие два ривала и тоа на „Камп Ноу“.
