Далас го победи Феникс, се испотепаа Нуркиќ и Маршал

Кошаркарите на Далас Маверикс и без повредениот Лука Дончиќ го победија Феникс Санс во Аризона со 98:89, а натпреварот го одбележа тепачка во која учествуваа двајца кошаркари.

Имено, Босанецот Јусуф Нуркиќ и кошаркарот на Далас, Наџи Маршал, си влегоа в лице и потоа босанскиот центар го удри в глава својот ривал.

Маршал веднаш му одговори со удар во главата, по што настана општа гужва на теренот. Во тепачката влезе и крилниот центар на Далас, ПиЏеј Вошингтон, па Нуркиќ заврши на паркетот.

Тогаш влетаа сите играчи и двете клупи, а на крајот судиите мораа да ги раздвојат тепачите.

Епилогот беше 3 исклучувања, па играта автоматски беше завршена за Нуркиќ и дуото од Далас. На крајот на краиштата, Нуркиќ сигурно ќе биде суспендиран и казнет.

Најдобар кај Далас беше Кајри Ирвинг со 20 поени, додека Дениел Гафорд додаде 16, а Спенсер Динвиди и Максимилиан Клебер по 15.

Кај домашниот тим единствен расположен беше Кевин Дурент со 35 поени. Нуркиќ на паркетот мина 13 минути пред да биде исклучен, во кои постигна 3 поени и имаше 5 скока 2 две асистенции.

Инаку, Далас водеше од почетокот на натпреварот, а Феникс само во третата четвртина покажа заби. Сепак, тоа не беше доволно да се загрози победата на гостите, кои се четврти во поредокот на Западната конференција со 20 победи и 11 порази. Феникс е на 11-то место со скор 15-15.

Табела: