Провокација на векот: Реал Мадрид испратил понуда за најдобриот играч и капитен на Барселона, Лионел Меси, ексклузивно објави аргентинскиот новинар Бруно Акоста.
Новинарот кој има речиси 50.000 следбеници на Twitter покрај ексклузивната и прилично неверојатна вест додава дека челниците на Барса веќе го известиле Меси за понудата од Мадрид.
Многумина се прашуваат дали е ова само провокација од Сантијаго Бернабеу упатена кон ривалот, со оглед на тоа дека Аргентинецот наводно му соопштил на тренерот Роналд Куман дека не е задоволен од ситуацијата во клубот.
Договорот на Меси со Барса истекува следното лето, а претходно ESPN објави дека раководството на каталонскиот гигант не би имало ништо против ако Меси го напушти клубот во случај да дојде соодветна понуда.
Како една од реалните опции се спомнува заминувањето на Меси во Манчестер Сити кај Пеп Гвардиола, а интерес покажа и Интер.
