Селото Санто Стефано ди Сесанио е познато по тоа што продаваше куќи за едно евро на оние кои сакаа да ги реновираат и да живеат во нив.
Властите отидоа уште еден чекор подалеку во тој план, така што ова италијанско село сега е подготвено дури и да им плати на луѓето да се преселат таму.
Ова средновековно село се наоѓа во регионот Абруцо. Поради постојаното иселување на локалното население, властите во Санто Стефано се обидуваат на секој начин да привлечат нови жители.
Затоа тие сега одлучија да им платат на луѓето кои се подготвени да се преселат тука и да започнат бизнис во ова село, а ќе ги поддржат потенцијалните жители и со тоа што ќе им дадат место за живеење со плаќање симболична сума за кирија.
„Ова не е никаков бизнис. Единствено што сакаме е да продолжи животот во ова село", изјави началникот на селото Фабио Сантавика за CNN.
За да бидете иден жител на Санто Стефано треба или да бидете жител на Италија или барем да имате можност да станете, како и да имате помалку од 40 години.
Избраните кандидати ќе имаат фиксен месечен приход за три години во износ од максимум 8.000 евра годишно. Исто така ќе добијат еднократен износ од максимум 20.000 евра, што ќе се искористи за започнување на претприемачка идеја и бизнис во селото.
Денес, Санто Стефано има само 115 жители, а околу половина се пензионери. Помалку од 20 се на возраст под 13 години.
Дали би се преселиле во ова живописно село?