Кеимада Гранде или Островот на змиите е познат и како едно од најопасните места во светот и Остров на смртта.
Бразилскиот остров се наоѓа во водите на Атлантскиот Океан во близина на Саун Пауло.
Златната змија е најголемата отровница на овој остров. Иако е долга само неколку сантиметри, нејзиниот отров може да предизвика откажување на бубрезите, некроза на мускулното ткиво, крварење на цревата, а на крај и смрт. За нејзиниот отров велат дека може да го стопи ткивото на човечкото тело.
На островот од 430 квадратни метри живеат и до 4.000 вакви змии, а со оглед на тоа дека островот е ненаселен од 1920 година, змиите се хранат со птици. Толку се имаат прилагодено на средината, што научиле да ползат по стеблата на дрвјата за да им се прикрадат на птиците кои живеат во крошните.
Бразилската влада ги казнува сите експедиции на Островот на змиите, а ловокрадците кои ги продаваат на црниот пазар за неколку илјади долари по парче се најголем проблем за бразилските власти.
Единствени на кои им е дозволен пристап на островот се научници и бразилската полиција.
Медицинските експерти сметаат дека отровот на златната змија може да се искористи во фармацевтски цели како помош во лекувањето на болести на срцето, згрутчување на крвта, па дури и рак.
Според легендата, на островот уште се наоѓа богатството на британскиот истражувач од 16. век сер Томас Кавендиш кој наводно таму го скрил пленот што го украл од Инките.
