Омикрон варијанта на COVID-19 веројатно ќе се прошири на меѓународно ниво и претставува „многу висок“ глобален ризик, а повисокиот раст на бројот на заразени може да има „тешки последици“ во некои области, соопшти во понеделникот Светската здравствена организација (СЗО).
СЗО ја класифицира оваа варијанта B.1.1.529 како „загрижувачка варијанта“ и додаде дека има голем број на мутации, од кои некои се загрижувачки.
Но, дали брзите домашни тестови можат да ја откријат оваа нова варијанта на вирусот? Професорката Линда Боулд од Универзитетот во Единбург објасни дека брзите домашни тестови го детектираат протеинот од вирусот за да го откријат неговото присуство, а не неговиот генетски состав, и затоа не можат да идентификуваат конкретна варијанта.
Боулд сепак посочува дека раните знаци покажуваат дека брзите тестови даваат позитивни резултати кај лицата заразени со варијантата омикрон, како и кај другите видови на ковид, пишува BBC.
Таа нагласува дека варијантата делта сè уште е најдоминантна во ОК и дека домашните тестови добро ја детектираат оваа варијанта на вирусот. Ова покажува дека брзите домашни тестови се исклучително корисни.
