Вредностите при стандардното мерење на температурата во сенка, на висина од два метра во летните месеци, споредени со температурата на асфалтот може да варираат од 10 до 20 степени Целзиусови.
Со цел временската прогноза да биде точна, се вршат и висински метеоролошки мерења, а овие податоци се добиваат со лансирање метеоролошки балони.
Директорот на Републичкиот хидрометеоролошки институт на Србија, Југослав Николиќ, вели дека на овој начин се добиваат метеоролошки параметри до 30 километри во висина, кои се од стратешко значење не само за временската прогноза, туку и за безбедноста на авионите, и за акциите насочени кон намалување на ризикот од град, како и елементарни непогоди.
Што се однесува до мерењето на температурата на земјата, таа се мери според одредени стандарди и на ист начин во секоја земја за да може да се споредуваат податоците.
Кога е олку жешко, како оваа сезона, граѓаните често немаат доверба во метеоролозите и убедени се дека температурата е многу повисока од официјалната.
Николиќ забележува дека температурата се мери во сенка на висина од два метра, а тоа е температурата што се објавува. Како што посочува тој, тоа може значително да отстапува на отворен простор од температурата на асфалтот, или на земјата - разликите можат да бидат од 10 до 20 степени Целзиусови.
Првите податоци пристигнуваат во компјутерскиот центар.
„Тука се собираат сите податоци и производи што нашите прогнозери ги користат за да направат краткорочни, сезонски и долгорочни временски прогнози“, објаснува директорот на РХМЗ, додавајќи дека нумеричката прогноза е уште поточна.
Со цел да се подобри прогнозата во цела Југоисточна Европа, Николиќ нагласува дека Републичкиот хидрометеоролошки институт на Србија иницирал формирање на таканаречен Конзорциум за нумеричко предвидување со понуда на стручна помош и соодветни алатки.
Метеоролозите во Македонија за денеска прогнозираат сончево и многу топло време, попладне со умерена облачност, а кон крајот на денот наместа ќе има појава на локална нестабилност со пороен дожд, грмежи и засилен ветер. Минималната температура ќе биде во интервал од 12 до 22, а максималната ќе достигне од 32 до 39 степени Целзиусови. УВ индексот ќе изнесува 9.