Во познатиот роман „1984“, Џорџ Орвел покажа како технологијата, на еден злокобен начин, би можела да се користи во иднината. Што би рекол денес?
Интересен прилог на телевизијата BBC ни дава (хипотетички) одговор на прашањето дали Џорџ Орвел би ја користел модерната технологија.
„Роден е како Ерик Блер. Името Џорџ Орвел било измислено да биде ‘што е можно поанглиско’. Орвел е река во Сафолк, а Џорџ е старо англиско име. Може да се каже дека Џорџ Орвел навистина направил ‘верзија на себе’, со која ги потпишал сите дела“, вели Адам Стоук, од универзитетот Јорк Сент Џон.
На некој начин, додава Стоук, ликот на Џорџ Орвел е сличен на тоа како го „креираме“ нашиот идентитет, односно како се претставуваме, особено на социјалните мрежи.
„Како и повеќето луѓе од тоа време, Орвел бил фасциниран од технологијата и нејзините можности, без да има ни најмала идеја како таа всушност функционира. Орвеловата ‘1984’ е полна со примери за тоа како технологијата може да им помогне на угнетувачките режими и системи“, истакнува Д. Џ. Тејлор, биограф на Орвел.
Како што објасни Адам Стоук, разликата помеѓу книгата „1984“ и сегашното време е во тоа што, во романот, целата технологија е во сопственост на државата, што не е случај денес.
„Машината е тука, а нејзината моќ да ги корумпира луѓето е речиси неодолива“
„И ние можеме да учествуваме и во користењето на технологијата. Нему веројатно би му пречело тоа како лагите може многу брзо да се рашират на интернет“, смета Стоук.
Од друга страна, Тејлор ја потенцира опсесијата на Орвел за тоа како ќе изгледал светот во иднина.
„Сосема е можно ако Џорџ Орвел живееше во денешно време да има профили на социјалните мрежи, во обид да напише некаков есеј за тоа како тие функционираат, исто како што пишуваше есеи за списанијата што ги читаа тинејџерите во негово време“, заклучува Тејлор.
