Пицата е популарно јадење со италијанско потекло, а градот Неапол се смета за нејзиното родно место. Се подготвува од тркалезна основа тесто, премачкана со доматен сос и додатоци како разни сирења, сувомеснати производи и/или зеленчук.
Пицата е едно од најпопуларните јадења и најчесто се смета за брза храна полна со калории. Сепак, тоа може да биде дел од урамнотежена исхрана, но под неколку услови.
„Јадењето парче пица со салата или зеленчук може да биде хранливо прифатливо, додека јадењето цела пица со масни додатоци како колбас може да има спротивен ефект“, вели нутриционистката Лорен Манакер за Eating Well.
Пицата содржи протеини, витамини од групата Б, калциум и железо. Зеленчукот како додаток го зголемува внесот на влакна, додека тестата од карфиол или цели зрна додаваат дополнителна хранлива вредност. Сирењето кое се додава во пицата содржи калциум, кој е клучен за здравјето на коските, како и цинк и магнезиум.
Сепак, пицата има неколку потенцијални недостатоци. Прво, често содржи над 1.000 милиграми натриум по порција, што е речиси половина од препорачаната дневна доза. Прекумерниот внес на натриум може да го зголеми ризикот од висок крвен притисок.
Пица со рафинирани јаглехидрати може да предизвика скокови на шеќерот во крвта, особено кај луѓето со дијабетес. Исто така, прекумерното консумирање пица може да доведе до внесување премногу калории, што може да предизвика зголемување на телесната тежина.
Изберете тенка кора наместо дебела.
Прескокнете ги полнетите кори и сосовите за макање.
Послужете ја пицата со салата или варен зеленчук.
Изберете посни протеини како пилешко наместо преработено месо.
Додадете зеленчук или овошје како ананас како додатоци.
Пробајте тесто од карфиол или наут.
Ако сакате класична кора, користете тесто од цело зрно.
