Односите меѓу Грција и Турција се на ниво од времето на Отоманската империја – двете земји се на раб на ескалирање на тензиите, оценува весникот „The Christian Science Monitor“.
Додека сите очи се вперени во Иран и Северна Кореја, двете соседни земји полека се лизгаат кон опасна територија во која и најмало погрешно толкување би можело да ги доведе Грција и Турција до сериозен конфликт, а не е исклучена и вооружена пресметка, вели авторот на текстот, Ник Скваерс.
Тој потсетува дека тензиите меѓу двете земји постојано растат во областа на Егејското Море, а тензиите дополнително се зголемиле откако Турција одби да ослободи двајца грчки стражари заробени долж границата, поради премин на турска територија. Грција тврди дека војниците се изгубиле во снежно невреме и дека сосема случајно влегле на територијата на Турција, а Турција смета дека станува збор за шпиуни.
Исто така, причина за напнатост се и постојаните воени вежби на копно и на море, на самата граница со Турција, како и најавата од Грција дека ќе испрати уште 7.000 војници на границата со Турција.
Двете земји се „препукуваат“ и на небо. Минатиот месец и грчки и турски авиони за малку ќе влезеа во соседскиот воздушен простор, поради што имаше предупредувачки стрелби од двете страни.
Провокациите на островите во Егејското Море не може ни да се добројат, пишува Скваерс.
Сега се поставува прашањето колку се влошени работите. Според „The Christian Science Monitor“, многу се лоши и весникот нагласува дека ниту едно спорно прашање меѓу двете земји од 1996 година наваму не е решено, вклучувајќи го и Кипар.
Судејќи по сѐ, ни актуелните власти нема да ги решат споровите. На пример, во Грција министер за одбрана е десничар кој за турскиот претседател Реџеп Тајип Ердоган вели дека е „лудак“, а властите во Анкара се националистички настроени. Со оглед на тоа дека во Турција се ближат избори, ситуацијата е сѐ позапаллива.
Грчкиот министер за надворешни работи веќе предупреди дека “Турција се доближува до црвената линија“, потсетува весникот.
Аналитичарите на „The Christian Science Monitor“ додаваат дека целокупниот однос меѓу Турција и Грција станал толку напнат што и најмало недоразбирање, погрешна проценка или потег множе да доведат до вооружен конфликт.
