Учеството на Израел на годинешниот Избор за песна на Евровизија предизвика низа контроверзии поради конфликтот во Газа, што резултираше со бројни протести во Малме.
Сепак, се чини дека Израел би можело засекогаш да го напушти ова престижно натпреварување поради сосема други причини.
Според информациите што ги објави шведски Aftonbladet, постои можност Израел да не учествува на Евровизија во 2025 година поради предложениот закон кој се однесува на приватизацијата на државната телевизија KAN.
Овој закон, предложен од израелскиот министер за комуникации, Шломо Кархи, може да доведе до исклучување на Израел од Европската радиодифузна унија (EBU), а со тоа и од Изборот за песна на Евровизија. Оваа информација ја потврдија од EBU за Jerusalem Post.
Предлог-законот веќе го усвои првото гласање во израелскиот Кнесет на 27 ноември, со поддршка на владејачките партии, додека конечното гласање се очекува на почетокот на јануари. Министерот Кархи не ги коментираше изјавите на EBU за можното исклучување на Израел од натпреварувањето доколку се усвои законот.
Вработените во KAN силно се спротивставуваат на предлогот, а уредникот Еран Цикурел ја нарече ситуацијата „автогол“, особено во светлината на меѓународниот притисок околу конфликтот во Газа.
„Цела година нашите противници се обидуваа да го спречат Израел да учествува на Евровизија, а сега тоа го прави министерот Кархи за нив, нè истурка надвор“, рече Цикурел.
Да потсетиме, Израел на Евровизија учествува од 1973 година, а со четири победи важи за една од најуспешните земји во историјата на ова натпреварување.
