Францускиот сатиричен весник Charlie Hebdo пред неколку дена објави провокативна насловна страница за британската кралица Елизабета Втора и актерката Меган Маркл, сопругата на принцот Хари.
На насловната е прикажана кралица со бесен израз на лицето, застаната со коленото на вратот на Меган, со коментар „Зошто Меган даде отказ од Бакингем?“, на што Меган одговара: „Затоа што не можев да дишам повеќе“. Карикатурата потсетува на смртта на афроамериканецот Џорџ Флојд кој почина откако полицаец му клекна на вратот и остана така повеќе од осум минути и покрај очајничките молби за помош од Флојд кој викаше „Не можам да дишам“.
Charlie Hebdo ja објави карикатурата само неколку дена откако принцот Хари и неговата сопруга Меган во интервју за Опра Винфри рекоа дека искусиле отворен расизам од членовите на семејството и вработените на кралскиот двор.
Карикатурата предизвика контроверзии. Халима Бегум, извршна директорка на Runnymede Фондот за расна еднаквост, за карикатурата рече дека е „погрешна на секое ниво“.
„Кралицата како убиецот на Џорџ Флојд ѝ го толчи вратот на Меган? Меган вели дека не може да дише? Тоа не ги поместува границите, не насмеа никого и не потсетува на расизам. Тоа е навреда“, рече Бегум.
Принцот Вилијам негираше дека кралското семејство е расистичко.
„Ние не сме расистичко семејство“, нагласи Вилијам.
Во изјавата во име на кралицата, Бакингемската палата рече дека се загрижени за обвинувањата за расизам изнесени од Сасекс и дека тие биле сфатени многу сериозно. Палатата одби да ја коментира контроверзната карикатура.
Што мислите Вие? Дали карикатурата на Charlie Hebdo е претерување?