Студиото Lionsgate работи на петтиот филм од популарната акциона франшиза John Wick.
Оваа вест ја потврди Џенефер Браун, извршен потпретседател на студиото, за време на неодамнешниот настан John Wick Experience кој се одржа во Лас Вегас, пренесува ComicBook. Сепак, сè уште не се знае дали Кијану Ривс ќе се врати во улогата на легендарниот платен убиец.
„Овој свет продолжува да расте и да се шири на неверојатни начини“, изјави Браун за ComicBook. „Следен е Ballerina, нашиот прв спин-оф филм, и едвај чекаме да го покажеме на светот. Се разбира, објавивме дека работиме на петтиот филм за Џон Вик. Мислам дека претстојат уште спин-оф, ТВ-серии и видеоигри.“
Кога новинарите ја прашаа за John Wick 5, Браун рече: „Веќе потврдивме дека работиме на петтиот филм за Џон Вик. Џон Вик всушност можеби е мртов. Сите нетрпеливо чекаме да дознаеме дали е тоа вистина“.
Четвртиот дел, објавен во 2023 година, заврши на начин што сугерираше дефинитивен крај на приказната за Џон Вик, што доведе многу фанови да заклучат дека нема да има повеќе продолженија. Но, Lionsgate сега потврди дека франшизата не е завршена. Сепак, останува прашањето дали Киану Ривс ќе ја повтори својата улога, бидејќи претходно изјави дека верува дека неговиот лик навистина починал.
Со потврда на петтиот филм во развој, филмскиот универзум на Џон Вик продолжува да се шири. По мини-серијата The Continental, која го истражуваше минатото на истоимениот хотел, следен проект во франшизата е Ballerina, спин-оф филм со Ана де Армас во главната улога, чија премиера е закажана за 6 јуни оваа година.
