Се тестираат два лека против маларија како можно средство за борба против COVID-19.
Во рамките на глобалното истражување, на повеќе од 40.000 здравствени работници од Европа, Азија и Јужна Америка кои биле во контакт со пациенти болни од COVID-19 ќе им биде даден хлорокин, хидрохлорокин или плацебо терапија.
Американскиот претседател Доналд Трамп неделава наиде на критики откако јавно соопшти дека зема хидрохлорокин превентивно, иако има предупредувања дека не е безбедно лекот да се зема на своја рака.
Првите британски учесници во глобалното истражување денеска почнуваат со тестирање во Универзитетските болници во Брајтон и Сасекс и во болницата Џон Редклиф во Оксфорд. Во наредните три месеци ќе добиваат хлорокин, хидрохлорокин или плацебо терапија. На учесниците во Азија ќе им се дава хлорокин или плацебо.
Во Велика Британија за тестирањето може да се пријави секој кој пружа медицинска нега на заразени со коронавирус, но под услов и самите да не се дијагностицирани со болеста. Тестирањето ќе покаже дали лекот може да делува превентивно кај здравствените работници изложени на вирусот.
„Навистина не знаеме дали хлорокинот или хидрохлорокинот помагаат или прават поголема штета кога се користат против COVID-19“, изјави проф. Николас Вајт од Универзитетот Оксфорд, водач на тамошното истражување.
Тој вели дека вакво контролирано истражување во кое се дава лек или плацебо терапија по случаен избор, е најдобриот начин да се провери тезата.
„Можно е да помине долго време додека да добиеме достапна, безбедна и ефикасна вакцина“, вели проф. Мартин Левелин од Медицинскиот факултет за Брајтон и Сасекс, кој е водач на истражувањето таму.
„Ако лек кој добро се поднесува, како хлорокин или хидрохлорокин, може да ги намали шансите од зараза со COVID-19, тоа ќе биде од непроценлива важност“, рече тој.
Овие лекови може да ги намалат високата температура и воспалението и се користат како превенција и терапија за маларија.
Хидрохлорокинот го регулира начинот на кој реагира имуиот систем и се користи како терапија и за ревматски артритис и Лупус.
Треба да се напомене дека овој лек се тестира во клинички контролирана средина и СЗО предупредува да не се зема на своја рака бидејќи не е докажано дека помага против коронавирусот, а може да предизвика сериозни проблеми со срцето.