Месото произведено во лабораторија од култивирани клетки би можело да биде 25 пати полошо за климата од обичното говедско месо.
Лабораториски одгледувано или „култивирано“ месо се добива со одгледување на животински матични клетки во средина богата со хранливи материи. Многумина претпоставуваат дека тоа би можело да биде похумана и позелена алтернатива на традиционалното месо бидејќи помалку земјоделска почва, храна, вода и антибиотици се користат за неговиот развој отколку во сточарството. Дополнително, во тој процес не се убиваат други живи суштества.
Но, новата анализа покажува дека масовното производство на месо одгледано во лабораторија со помош на сегашните технологии може да биде значително полошо за животната средина од одгледувањето говедско месо. Во моментов, месото базирано на животински клетки (ACBM) се произведува само во многу мал обем и со економска загуба, а новото истражување сугерира дека зголемувањето на процесот може да предизвика меѓу четири и 25 пати повеќе емисии од глобалната говедска индустрија, пишува New Scientist.
„Секторот ACBM доби милијарди долари од инвеститорите врз основа на тврдењето дека овој производ ќе биде поеколошки од говедското месо“, велат истражувачите во студијата, која сè уште не е рецензирана. Иако е точно дека на месото одгледувано во лабораторија не му требаат почва, вода и антибиотици како добитокот, експертите наведуваат дека досега биле правени погрешни анализи на емисијата на јаглерод.
Проблемот, тврдат тие, е што многу од тие извештаи го моделираа влијанието врз климата на ACBM користејќи технологии кои или не постојат или веројатно нема да функционираат. На пример, една често цитирана студија ги процени емисиите на јаглерод од производството на ACBM користејќи хидролизат нацијанобактерии како суровина на клетките.
Сепак, авторите на најновата студија објаснуваат дека „ова не е технологија или суровина што моментално се користи за размножување на животински клетки, ниту пак е моментално блиску до тоа да биде изводливо“.
Други познати извештаи го анализираа влијанието врз животната средина на култивираното месо произведено со компоненти на медиум за одгледување храна. Меѓутоа, во моментов таков процес е можен само со употреба на мешавини на хранливи материи од фармацевтска класа кои се прочистени до високи нивоа.
Токму овој процес на прочистување е одговорен за најголемиот дел од емисиите. На пример, за одгледување на лабораториско месо, апсолутно е неопходно да се отстрани ендотоксинот, кој го ослободуваат бактериите во околината, бидејќи дури и мали количини во медиумот за култура може да го спречат размножувањето на клетките.
Претпоставувајќи континуирана употреба на високо рафинирани средства за одгледување, експертите проценуваат дека од 246 до 1.508 килограми емисии на јаглерод диоксид се произведуваат за време на развојот на килограм ACBM, што значи дека месото одгледано во лабораторија може да предизвика помеѓу четири и 25 пати повеќе емисии од глобалната индустријаза произведство на говедско месо.
Авторите на студијата понудија и решение за овој проблем и рекоа дека треба да се работи на развој на клеточни линии кои можат да толерираат повисоки нивоа на ендотоксин.
Истражувањето Environmental impacts of cultured meat: A cradle-to-gate life cycle assessment беше објавено на bioRxiv.
