Секоја недела можете да сретнете статија на интернет порталите која ви вели дека треба да спиете осум часа дневно за да го одржувате здравјето во добра состојба, но дали навистина е потребно да потрошите третина од денот во спиење?
Познато е дека Маргарет Тачер успеваше да ја врши функцијата премиер на Велика Британија со само четири часа спиење во денот, а Доналд Трамп неретко кажува дека му се доволни само три часа сон. Прашањето не е дали можете да издржите без осумчасовен сон, туку дали тоа има ефекти на вашето здравје.
Кога ќе се погледнат сите ефекти кои недостатокот од сон ги има на здравјето, може да се воочи дека иако нема почувствувате никакви промени во младоста, сепак староста нема да може да го издржи тој напор и вашата здравствена состојба може значително да се влоши.
„Бројот на луѓе кои можат да преживеат со шест часа спиење дневно, без притоа да доживеат некакви негативни ефекти на нивниот мозок или тело може да се заокружи на нула“, вели Метју Вокер, професор по невронаука и психологија на Универзитетот Беркли.
Докторите го поврзаа недостатокот од сон со ослабната меморија, губење на концентрацијата и промени во расположението, а кај мажите може да предизвика и недостаток од тестостерон. Зголемување на телесната тежина е исто така еден од контра-ефектите, поради тоа што со неспиење се зголемува хормонот кој прави да се чувствувате гладни.
Во подоцнежните години од животот Маргарет Тачер патеше од деменција, за која докторите рекоа дека е причинета од преголем замор на мозокот, кој пак настанал од недостатокот од сон. А кога се работи за Доналд Трамп, доволно е да го погледнете и да ги забележите сите горенаведени симптоми, посебно промената на расположение.
Идеалното време за спиење е осум часа дневно. Ако спиете само еден час помалку, ќе почнете да ги чувствувате ефектите од заморот и недоволното количество на сон.