Научниците за прв пат се обидоа да направат тродимензионален модел од мозок на неандерталец, што е оригинален пристап кој би можел да помогне во подобро разбирање на овие роднини на луѓето, иако не и во решавање на мистеријата за нивното исчезнување.
„Обидите во 3D технологија да се реконструира мозокот во внатрешноста на фосилниот череп е потполно нова работа“, изјави Наомичи Огихара, еден од авторите на истражувањето кое ги спојува „физичката антропологијата, механичкиот инженеринг и невронауката“.
За да ја изведат реконструкцијата, научниците врз основа на магнетни резонанци на речиси 1.200 луѓе направиле модел на она што го нарекуваат „просечен“ мозок на Хомо сапиенс од 21 век.
Потоа, дигитално го „деформирале“ тој тип на мозок за да одговара на черепот на неандерталците и древниот хомо сапиенс.
„Уште сме далеку од тоа добро да го разбереме мозокот на праисториските луѓе, но секој мал чекор во тој правец е од голема корист“, вели Антоан Балзо, палеоантрополог.
Реконструкцијата покажа дека „хомо сапиенсите имале значително поинаква морфологија на мозокот, како и поголем мал мозок“, стои во истражувањето објавено во магазинот Scientific Reports“.
Неандерталците се појавија во Европа, Централна Азија и Блискиот исток пред околу 200.000 години.
Тие исчезнаа пред околу 30.000 години, но причината не е позната, а според еден од авторите на истражувањето можеби токму величината на нивниот мозок има некаква врска со тоа.
„Постојат реални морфолошки разлики помеѓу мозоците на овие две врсти, што може да доведе до разлика во когнитивните и социјалните капацитети. Тие разлики би можеле да бидат суптилни, но и суптилните разлики можат да се покажат значајни кога доаѓа до природна селекција“, проценува Наомичи Огихара.
