Сите го имаме оној пријател или член на семејството кој секогаш се жали дека му студи. И во екот на летото имаат ладни раце или нозе и се жалат дека имаат чувтсво како да е зима.
Постојат неколку медицински состојби кои исто така можат да бидат виновни што постојано ви студи.
Иако во повеќето случаи не предизвикува сериозни проблеми, Рејноовата болест влијае на циркулацијата и може да предизвика студ кај некои луѓе. За некои, ова ќе ги направи врвовите на прстите побледи, а за други, кожата ќе биде сина. Во овој случај, можете да го загреете домот, да носите топла облека, особено на рацете и нозете, и да вежбате, бидејќи вежбањето ја подобрува циркулацијата.
Професорот Адам Тејлор рече дека хипотироидизмот, или неактивна тироидна жлезда, е уште една состојба поради која може да се чувствувате ладно. Оваа состојба обично се третира со синтетички хормони.
Хормоните вклучени во менструалниот циклус можат да влијаат на температурата на телото кај жените.
„Голем број полови хормони влијаат на системот кој ја регулира нашата температура. На пример, естрогенот предизвикува проширување на крвните садови, што помага да се намали телесната температура, додека прогестеронот има тенденција да предизвика повисока телесна температура. Синтетичкиот прогестерон, кој се наоѓа во оралните контрацептиви, предизвикува долгорочно покачување на телесната температура“, тврди професорот Тејлор, додавајќи дека пред овулацијата, температурата на жената е околу 35,9 степени, а неколку дена подоцна достигнува максимум од околу 36,7 степени.
Професорот Тејлор истакнува дека артериосклерозата, која е резултат на таложење на наслаги на крвните садови, е исто така една од причините за чувството на студ.
„Постојат различни типови на оваа состојба, но онаа што најчесто предизвикува чувство на студ е периферната артериска болест, каде што се стеснуваат артериите кои ги снабдуваат вашите екстремитети со крв“, вели тој.
Ако симптомите се суптилни или воопшто ги нема, може да потрае доста време пред да ви биде дијагностициран дијабетес. Клучните знаци вклучуваат често одење во тоалет, прекумерна жед и замор, а чувството на студ е еден од поретки знаци на состојбата.
Кога некој има недостаток на железо, кое го добиваме од јадење месо, темнолиснат зеленчук и мешунки, рацете и стапалата можеби се постудени, но почести симптоми се отежнато дишење и замор.
Многу луѓе страдаат од проблеми со срцето или циркулацијата, но некои од овие состојби ќе останат недијагностицирани. Студените стапала може да бидат знак за занемарена, но сериозна состојба наречена болест на периферните артерии. Тоа се случува кога акумулацијата на масни наслаги во артериите го ограничува протокот на крв во нозете.
