Евандер Холифилд, поранешен шампион во бокс во тешка категорија, верува дека ќе има и трета борба против Мајк Тајсон, 23 години откако се соочија последен пат.
И во двете досегашни борби Холифилд беше подобар. Во ноември 1996 година, тој го победи Тајсон со технички нокаут, а половина година подоцна направија реванш што стана една од најпознатите борби во историјата на боксот. Тогаш, Тајсон беше дисквалификуван откако во третата рунда го гризна Холифилд за уво и му откина парче.
За потсетување, 54-годишниот Тајсон е во форма - се бореше на добротворен спектакл против Рој Џонс кон крајот на ноември, што беше негово враќање во рингот по 15 години. Холифилд не се борел 11 години.
Тајсон виде придобивка во ова (борбата донесе приход од 80 милиони долари) и сега поголеми се шансите да се согласи да се бори против Холифилд, кој го предизвика. И Холифилд верува во тоа.
„Разговаравме и се чини декa борбата ќе се случи. Јас сум многу убедлива личност и мислам дека ќе се случи. Ајде!“, изјави 58-годишниот Холифилд за TMZ.