И САД се подготвени да го откажат учеството во историскиот состанок помеѓу американскиот претседател Доналд Трамп и севернокорејскиот лидер Ким Џонг Ун, соопшти потпретседателот на САД Мајк Пенс.
Овој состанок е закажан за следниот месец, во Сингапур, а Северна Кореја веќе го доведе во прашање неговото одржување.
Пенс за американските медиуми изјави дека Северна Кореја не би требало да се обидува да бара концесии од САД за ветувања кои нема намера да ги одржи.
„Ќе биде голема грешка кога Ким Џонг Ун би помислил дека може да го надигра Доналд Трамп“, оцени Пенс.
Агенцијата Ројтерс пренесе дека Трамп денеска ќе се сретне со јужнокорејскиот претседател Мун Џае Ин, за заедно да заклучат дали Пјонгјанг е сериозен околу договорот за денуклеаризација на корејскиот полуостров.
Како што се пренесува, Мун е повикан во Белата куќа за да помогне да се утврди дали Ким зазема потврд став против денуклеаризацијата.
Ако состанокот се откаже или пропадне, тоа ќе биде голем удар за Трамп, бидејќи според неговите поддржувачи токму средбата со Ким би можела да биде „најголемото достигнување на Трамп во неговиот претседателски мандат“.
