Поранешната извршна директорка на Pepsi Co. Индра Ноји, една од ретките не-белци која некогаш водела голема американска компанија, вели дека никогаш не барала покачување на платата и еднаш го одбила за време на финансиската криза.
„Никогаш, никогаш не сум побарала покачување. Сметам дека тоа е срамно. Не можам да замислам да работам за некого и да кажам дека мојата плата не е доволна“, изјави Ноји за New York Times Magazine.
Само 31 жена управуваат со компании на берзанскиот индекс S&P 500, а тој број дополнително опадна откако Ноји поднесе оставка во 2018 година. Жените исто така заработуваат помалку од нивните машки колеги на исти позиции.
Во последната година од работата, Ноји не се најде ни блиску до врвот на листата на најплатени директори во американските компании, ниту пак повеќето други жени.
Таа година, Сафра Кац од Oracle беше најплатената директорка на рангирањето на Bloomberg, рангирана на 33-то место.
„Никогаш не сум побарала од одборот да ми даде повеќе пари. Всушност, една година одборот ми даде покачување и јас реков дека не сакам. Ме прашаа зошто? Тоа беше веднаш по финансиската криза и јас реков не сакам покачување“, објасни Ноји.
Додека Ноји сè уште беше во Pepsi, многу студии покажаа дека жените не преговараат за нивните плати толку често како мажите, што потенцијално придонесува за родовиот јаз во платите.
Американската бизнисменка Шерил Сандберг во својата книга „Lean In“ им кажа на жените дека само треба да побараат и ќе го добијат тоа што го бараат. Оттогаш, истражувањата на McKinsey & Co. и LeanIn.org покажаа дека жените се вклучени во процесот исто како и мажите. Но, сѐ уште постојат разлики, тие се со помала веројатност да добијат покачување, што би можело да го објасни нивното првично воздржување.
Ноји денес е на одборот на Amazon.com и неодамна објави мемоари со наслов „My Life in Full“.
По нејзиното заминување од Pepsi, платите на директорите се зголемија, но минатата година само пет жени беа меѓу 100-те најплатени бизнис лидери во Америка.
