Вечерва ќе се бие тешка битка во групата Б каде сите сценарија се можни бидејќи сите четири тимови се во игра за пласман во одминафиналето.
Во Милано ќе има пресметка на Интер и Шахтар, а на двата тима им е потребна победа.
Латералниот дефанзивец на „Нераѕурите“, Данило Д'Амброзио, го сподели своето мислење во пресрет на вечерашниот „да се биде или не“ натпревар.
„Она за кое најмногу жалиме е што оставивме пласманот да ни зависи од самиот крај. За потоа да нема уште нешто за жалење мораме да ги освоиме трите бода. Очекуваме навистина тежок натпревар и ќе мора да ја држиме концентрацијата на високо ниво бидејќи Шахтар има квалитет да ни направи пробелми. Ќе мора да дадеме 110 посто за да дојдеме до победата“, вели тој.
Д'Амброзио е познат како неуморен војник и е еден од најголемите борци на Антонио Конте. Голем плус за него како играч е што може да игра на неколку позиции.
„Минатата година играв повеќе како латерален бек, а потоа како еден од тројцата дефанзивци. Шефот ни овозможува повеќе варијанти за да бидеме подготвени да покриваме повеќе позиции на теренот. Така да мојата позиција не е важна, туку колективитетот е важен, како и остварување на поставените цели“.
На новинарско прашање дали овој тим на Интер е најсилен откако тој е дел од клубот, Данило не можеше да каже. Тој го носи црно-синиот дрес од јануари 2014 кога дојде од редовите на Торино.
„Тука сум многу години, но не можам да направам споредба. Во однос на минатото, нашиот начин на игра и самиот пристап кон овој дрес се променети. Сигурен сум дека ќе ја минеме групава бидејќи имаме победнички менталитет“.
Интер и Шахтар играат вечер од 21 часот, а во истото време во Мадрид ќе се сретнат Реал и Борусија од Менхегладбах.
