Градоначалникот на Белград, Александар Шапиќ, најави дека јавниот превоз во Белград од 1 јануари 2025 година ќе биде бесплатен за сите, пренесува N1 Srbija.
„Од 1 јануари 2025 година целиот јавен превоз во Белград ќе биде бесплатен. Тоа значи дека веќе никој нема да мора да плаќа билет. Нема веќе месечни, годишни или попусти. Со оваа социјална мерка, Белград станува единствениот град во Европа со повеќе од половина милион луѓе кои имаат бесплатен превоз“, рече Шапиќ на прес-конференција.
„До крајот на 2025 година нема да има автобус постар од две години на улиците, па дури и тие две или две и пол години ќе бидат само оние што ги купивме на крајот на 2022 година, бидејќи е грев да не да ги користат тие возила затоа што се навистина нови. Сите останати ќе бидат од 2023 и 2024 година“, рече Шапиќ.
Тој додаде дека првиот од 25-те трамваи што Градот ги купи од турската компанија Bozankaya ќе почне да пристигнува следната година.
„А, до крајот на 2027 година си поставивме задача да обезбедиме средства за сите тролејбуси, тоа се 100 тролејбуси и овие другите 100 трамваи или 120 трамваи, да ги купиме, ќе видиме дали ќе биде преку јавно-приватно партнерство, ако сакаме нешто да осигураме. Најважно е да ги добиеме новите возила што е можно побрзо“, рече тој.
Во меѓувреме, градоначалничката на главниот град на Македонија, Данела Арсовска, се препукува со политичките неистомисленици и не знае ни каква е состојбата со јавниот превоз во Скопје.
Запрашана за тоа уште за колку дена ЈСП Скопје има нафта за автобусите од интервентната набавка и кога ќе се распише тендер, таа рече дека не би знаела да одговори.
